+ الرد على الموضوع
النتائج 1 إلى 8 من 8

الموضوع: حواديت زمان

  1. #1

    حواديت زمان

    صلوا على النبى

    عليه افضل صلاة وسلام

    كان ياما كان فى قديم الزمان

    حكايات وحكايات من اجمل القصص

    من الجدات


    اااااااالله حتى وانا بحاول افتكر كان زمان

    جميل اوى


    حتى الحكايات متهيالى دلوقتى قليل

    اوى ان ام تحكى حدوته لولادها او جدة

    هههههههههههههههههههههه


    هما فاضين اساسا اهئ اهئ

    طيب يالله محدش يدخل بايده فاضيه


    كل حد يحكيلنا حدوته من حواديت زمان

    سندريلا والشاطرحسن وامنا الغوله

    وووووووووو كل الحودايت الى افتقدناها

    من الاخر هنعمل

    موسوعه لحودايت زمان

    وننزل كل الحودايت القديمه ونستمتع

    بيها ونحكيها لولادنا

    وتوته توته فرغت الحدوته حلوة ولا بتوته


    أكتب تعليق
    [SIGPIC][/SIGPIC]
    .نظر الله لي فارشد أبنائي ....................... فشدوا إلى العلا أي شد
    إنما الحق قوة من قوى الديان ............... أمضي من كل أبيض وهندي
    قد وعدت العلا بكل أبي من رجالي .................. فانجزوا اليوم وعدي
    وارفعوا دولتي على العلم والأخلاق ................ فالعلم وحده ليس يجدي
    نحن نجتاز موقفاً تعثر الآراء فيه ..................... وعثرة الرأي تردى
    فقفوا فيـه وقـفة حزم .................. وارســوا جانبيـه بعزمة المسـتعد





  2. #2
    جدتى الله يرحمها كانت بتحكيلى حكايه ييجى كده من 50 قصدى 30 سنه عن( ست الحسن والجمال )
    بتقول الحدوته ان ست الحسن والجمال كانت بتملا مياه من البير والمشكله ان امنا الغوله كانت قاعده عند البير ولما راحت البير دار هذا الحوار بينهما
    امنا الغوله : ايه رايك فيا ؟
    ست الحسن : جميله اوى يا امنا الغوله
    امنا الغوله:ايه رايك فى شعرى
    ست الحسن: جميل اوى يا امنا الغوله
    امنا الغوله : يحليلك دنياكى يا بنتى .
    وقالتلها انزلى البير املى يا بنتى ودعيتلها قائله : يا بير يا بير اديها فلوس كتير يا بير يا بير اديها ذهب كتير ولما رجعت بيتها كانت كل ما تيجى تتكلم ينزل من فمها ذهب او فلوس مما اثار غيرة بنت زوجة ابيها ولما عرفت ان ده حصلها لما راحت البير قالت انا اللى حروح البير غدا وبالفعل عندما ذهبت قابلت امنا الغوله ودار هذا الحوار
    امنا الغوله : ايه رايك فيا ؟
    الفتاه : شكلك مخيف ومرعب
    امنا الغوله : ايه رايك فى شعرى ؟
    الفتاه : عامل زى المقشه وشكله مقر ف
    امنا الغوله : يقرف دنياتك يا بنت
    وقالتلها انزلى البير املى ودعيتلها قائله يا بير يابير اديها صراصير كتير يابير يا بير اديها طوب كتير ولما رجعت بيتها كانت راجعه بالقرف كله وتوته توته خلصت الحدوته

    [SIGPIC][/SIGPIC]
    .نظر الله لي فارشد أبنائي ....................... فشدوا إلى العلا أي شد
    إنما الحق قوة من قوى الديان ............... أمضي من كل أبيض وهندي
    قد وعدت العلا بكل أبي من رجالي .................. فانجزوا اليوم وعدي
    وارفعوا دولتي على العلم والأخلاق ................ فالعلم وحده ليس يجدي
    نحن نجتاز موقفاً تعثر الآراء فيه ..................... وعثرة الرأي تردى
    فقفوا فيـه وقـفة حزم .................. وارســوا جانبيـه بعزمة المسـتعد





  3. #3
    كان يا ماكان فلاح عجوز عنده حتة ارض , ومتعود يزرعها والارض تطلع حب وفول وشعير , وكل اللى يزرعه الفلاح يطلع كويس وتمام , وكان فى بلد الفلاح بير ميه , بياخد منها الميه , ويسقى الارض ...
    وفى يوم من الايام راح الفلاح بعد ما دفن الحبوب فى الارض , راح للبير يجيب الميه لكن لقى البير مافهوش ميه , فقعد يفكر هيعمل ايه , وهيجيب لعياله اكل منين دا الزرع اللى بيزرعه هو اللى بياكل منه هو وعياله , ففكر وقرر انه يروح لحد غنى يساعده , فراح للتاجر , وخبط ع الباب لقى التاجر مش موجود , لانه راح يطلب مساعده من كبير التجار , فقال لما التاجر رايح لليساعده , انا كمان اروح لكبير التجار بدل ماطلب من التاجر اللى محتاج مساعده ...فراح لكبير التجار لقيه مش موجود لانه عند الوزير بيطلب المساعده , فقال اروح للوزير اطلب منه المساعده , مالقهوش موجود لانه عند السلطان بيطلب المساعده , فقال اطلب من السلطان , وراح للسلطان فتحوله الباب لقى السلطان قاعد على سجادة الصلاه ورافع ايديه للسما وبيقول يا رب ساعدنى , وراح باصص للفلاح وقال : اامر يا فلاح , محتاج ايه؟
    فدحك الفلاح وقاله : انا مش محتاج منك حاجه .. انا هطلب من اللى انت طلبت منه , ورفع ايديه للسما وقال : يارب ساعدنى انا حرثت الاض , وزرعت الحب , ومش لاقى الميه ... يارب ساعدنى ...
    راحت الدنيا مطرت مطر شديد , والزرع شرب الميه , وطرح حب وفول وشعير ...

    الحكمه من الحدوته , لانه دى اهم حاجه كانت بالنسبه لوالدى : لا تعتمد على احد غير الله , لانه اكبر من كل شىء , وهو اللى عنده مفاتيح كل شىء تتمناه..
    وتوته توته فرغت الحدوته .. حلوه ولا ملتوته...

    [SIGPIC][/SIGPIC]
    .نظر الله لي فارشد أبنائي ....................... فشدوا إلى العلا أي شد
    إنما الحق قوة من قوى الديان ............... أمضي من كل أبيض وهندي
    قد وعدت العلا بكل أبي من رجالي .................. فانجزوا اليوم وعدي
    وارفعوا دولتي على العلم والأخلاق ................ فالعلم وحده ليس يجدي
    نحن نجتاز موقفاً تعثر الآراء فيه ..................... وعثرة الرأي تردى
    فقفوا فيـه وقـفة حزم .................. وارســوا جانبيـه بعزمة المسـتعد





  4. #4
    الارنب الطماع

    كان يا ماكان فى سالف العصر والاوان راجل فلاح , عنده ارنب وحمار , وكان يخرج الفلاح فى الصبح بدرى , ويرجعلهم باكلة (البرسيم) , ويقول : كل يا ارنب .. كل يا حمار ., بس الارنب طماع بسرعه ياكل من ناحية الحمار قبل ما ياكل من ناحيته , ويقول للحمار : ايه دا يا حمار بالراحه الاكل ماتاكلش بسرعه , وتخلص كل الاكل , والحمار يستغرب هو ليه الارنب بيقول عليه كدا ليه ( علشان طماع ) بس الحمار مايعرفش انه طماع , ويخلص الارنب كل الاكل , وبالليل وهو قاعد ويا الحمار قال الارنب : هحكيلك حدوته .
    فرح الحمار وقال : ايوه احكيلى .
    قال الارنب : كان يا ماكان زمان كان فيه حمار شاطر , كان صحيح حمار لكن كان اشطر الشطار , كان صاحبه ياخده يربطه فى الساقيه وهو حمار بقى يلف شغال فى الساقيه .. يحط الفلاح عليه الاوزان , وهو حمار بقى يشيل مايقولش لاء , يربطه الفلاح فى المحرات , وهو حمار بقى يشد المحرات..
    وكمل الارنب وقال : لكن كان هو صحيح حمار , لكن كان اشطر الشطار , ومره واحده الحمار اللى هو اشطر الشطار قام حادف نفسه , ووقع نفسه جوا البير , وجه الفلاح يشيله , وينيمه ولا يحطه فى ساقيه ولا فى محرات , ولا يحط عليه اوزان , وكل يوم يجبله الاكل لحد عنده وياكله الاكل فى بقه , والحمار مرتاح ومش تعبان ولا بيشيل ولا بيحط , وبس بياكل....
    وتوته توته والارنب خلص الحدوته .
    قام الحمار قاله : انا كمان لازم اكون اشطر الشطار , وتانى يوم مره واحده راح حادف نفسه جوا البير , والحمار الخايب راسه اتخبطت جوا البير , ورجليه اتكسرت عشان خايب وسمع كلام الارنب الطماع , راح جه الفلاح وجرى عليه وشاله من جوا البير , والارنب كان فرحان وسعيد خلاص دلوقتى الحمار مكسور وهيقدر الارنب ياكل كل الاكل , وكمان يمكن الحمار يموت , والارنب ياخد راحته على الاخر فى الاكل.
    والفلاح قال : لازم نجيب الدكتور , وجه الدكتور وقال : الحمار ضرورى لازم يشرب ( شوربة ارنب) , ولو ماشربش (شوربة ارنب ) الحمار ساعتها لازم هيموت , والفلاح خايف على حماره اللى بيزق الساقيه , ويشد المحرات , ويشيل الاوزان , ويقوم يجرى ورا الارنب الطماع, والارنب الطماع يجرى , يمسكه الفلاح ويعمله (شوربه) يشربها الحمار ويروق .... ومن يومها والحمار مايسمعش اى حدوته يقولها اى (مكار).

    الحكمه من حدوتة اليوم : ( اياك والطمع لانه الطمع بيخلى صاحبه ايه ؟ ( شوربة ارنب) )

    [SIGPIC][/SIGPIC]
    .نظر الله لي فارشد أبنائي ....................... فشدوا إلى العلا أي شد
    إنما الحق قوة من قوى الديان ............... أمضي من كل أبيض وهندي
    قد وعدت العلا بكل أبي من رجالي .................. فانجزوا اليوم وعدي
    وارفعوا دولتي على العلم والأخلاق ................ فالعلم وحده ليس يجدي
    نحن نجتاز موقفاً تعثر الآراء فيه ..................... وعثرة الرأي تردى
    فقفوا فيـه وقـفة حزم .................. وارســوا جانبيـه بعزمة المسـتعد





  5. #5
    صح وغلط

    كان ياماكان فى سالف العصر والاوان امير صغير كان يعمل الغلط ويقول عليه صح ...
    كان يروح الجنينه يلعب النشان وقدام كل الناس ,يكسر بيض العصافير , والناس تقول : ليه يا امير دا غلط؟
    الامير يرد قدام كل الناس ويقول : الغلط اللى بتقولوا عليه غلط دا مش غلط , دا الصح وانا عملت الصح !!!!
    وفى يوم من ذات الايام يفتح الامير شباك اوضته ويبص يلاقى الشمس فى وسط السما لكن الجناينى مش موجود فى جنينة القصر , والامير مش عارف فين الجناينى , وكل شويه الامير يروح عند شباك القصر , وشويه كمان يروح عند باب القصر يستنى الجناينى يظهر....
    الشمس بتغيب شويه بشويه , والشمس غابت ومشيت والقمر طلع وانتهى يوم من الايام , ولسه الامير مستنى الجناينى اللى لسه ماجاش..
    فجاه سمع الامير صوت فى الظلمه جاى من جنينة القصر , يقوم الامير يبص بسرعه على الجنينه يشوف حاجه غريييييييييييبه جدااااااا....
    يشوف الجناينى ماسك فانوس ومقرب قدام ورده
    وبيسال : الا هى دى ورده ولا ايه ؟ , وان كانت ورده يبقى لونها بالظبط ايه ؟
    الامير يسمع كدا ويتعجب اكتر عجب , ويسال الجناينى عن السبب.. ويقول للجناينى : انت ليه يا راجل انت سايب النهار وبتشتغل بالليل ؟
    يرد عليه الجناينى ويقول : تعرف يا امير انا قررت اعمل الليل نهار , وكمل الجناينى وقال : اصل انا بحب كدا.....
    يستغرب الامير من الكلام ويروح ينام , ويفضل الجناينى ايام كتيره على الحال دا , يسقى الورد بالليل..
    لكن وفى يوم من الايام بيبص الامير يلاقى الجناينى بيغسل جلابيته السودا فى النهار , ودا عادى لكن العجيب انه الجناينى بيغسل فى جلابيته السودا طول النهار , مره فى مية البحيره ومره بمية النافوره ومره بمية الخرطوم ...
    ويقول الامير لنفسه: انا عمرى فى حياتى ماشفت كدا من اى حد , وينادى الامير على الجناينى ويساله : انت ياراجل انت ..حكايتك ايه؟ ماسبتش اى ميه الا وغسلت بيها الجلبيه وانت من طلعة النهار ولحد ما قرب الليل وانت هات يا غسيل غسيل فى الجلبيه ...
    يرد الجناينى ويقول : اصل الحكايه يا امير انى عايز الجلبيه السودا تبقى بيضا... والامير يتغاااظ ويقول للجناينى : انت حكايتك ايه بالظبط ؟ , مره عايز تعمل الليل نهار , ومره عايز تعمل الاسود ابيض.. ويكمل الامير كلامه ويقول : اسمع يا راجل انت , ولاعمره الليل هيبقى نهار ولا عمره الاسود هيبقى ابيض...
    ابتسم الجناينى وقال : تمام يا امير عمر الليل ما يبقى نهار , وعمر الاسود ما يبقى ابيض .. وكمل وقال : لكن كمان يا امير الزمان عمر الغلط ما يبقى صح , والجناينى يمشى , وفى الليله دى الامير مانمشى , ولما طلع النهار مابقاش الامير ابدا ابدا بيعمل الغلط ويقول ان هو اللى بيعمله صح..

    الحكمه من الحدوته : ( اياك والعند فى الغلط , وخليكم ياحلوين فاكرين ان الغلط دايما غلط , والصح هيفضل طول عمره صح .. ولازم نغير من نفسنا ونعمل الصح بدل مانعمل الغلط) .

    [SIGPIC][/SIGPIC]
    .نظر الله لي فارشد أبنائي ....................... فشدوا إلى العلا أي شد
    إنما الحق قوة من قوى الديان ............... أمضي من كل أبيض وهندي
    قد وعدت العلا بكل أبي من رجالي .................. فانجزوا اليوم وعدي
    وارفعوا دولتي على العلم والأخلاق ................ فالعلم وحده ليس يجدي
    نحن نجتاز موقفاً تعثر الآراء فيه ..................... وعثرة الرأي تردى
    فقفوا فيـه وقـفة حزم .................. وارســوا جانبيـه بعزمة المسـتعد





  6. #6
    علم ولا دهب

    كان يا ماكان فى يوم من الايام اتنين اصحاب, راحوا يشتغلوا عند خباز عجوز , والشغل مع الخباز كان متعب جدا , لانهم يروحوا يجمعوا الحطب , يقوم المطر ينزل فوق الحطب ويبله , يقوموا يفضلوا ينشفوا فى الحطب طول اليوم لحد ما الحطب ينشف من الميه عشان يخبزوا بيه الخبز .....
    والخباز العجوز يقول للاتنين الاصحاب : انتوا تشتغلوا واكسب انا , انتوا تتعبوا وارتاح انا , وتفضلوا تشتغلوا عندى طوووووووول السنه , وانا فى اخر السنه اديكم اجرتكم ....
    يقول الاتنين فى نفسهم : ياااااااااااااااااااااااا ااااااه نفضل نشتغل سنه بحالها عشان ناخد اجرتنا , ويقولوا فى نفسهم : يالا سنه هتفوت بسرعه ان شاء الله..
    والايام تفوت وراها ايام وكل يوم ينزل المطر وينشفوا الحطب , ويخبزوا الاكل لحد ما السنه خلصت...
    ويروحوا للعجوز , عشان يديهم الاجره .. يقولهم العجوز : اللى عايز اجرته دهب اديهاله دهب , واللى عايز اجرته علم اديهاله علم...
    يقول الصاحب الاول : انا عايز اجرتى دهب , وياخد الدهب ويفرح , ويقول : يااااااااااه بعد شغل سنه بحالها اخيرا اخدت اجرتى, وكمان دهب , وهيخلينى الدهب دا غنى لسنين كتييييييييير قدام..
    والصاحب التانى يقول للعجوز : انا هاخد اجرتى علم , ضحك الخباز العجوز وقاله : شوف انت اشتغلت بكام , وانا مقابل شغلك دا تستاهل انى انا اعلمك لغة (الحمام)...
    يقول الاخ اللى اختار العلم : ازاى هو الحمام ليه لغه؟ , وحتى لو كانت له لغه , ياترى هتفيدنى فى ايه لغة الحمام ؟ , ومايلاقيش جواه اجابه , لكن ياخد من الخباز علم لغة الحمام , ويمشى قلقان ومهموم , لانه مش معاه فلوس ولا اى حاجه ياكل ويشرب منها .... وفضل يمشى يمشى وكل ما يحس بالجوع يستحمل , وكل مايحس بالتعب يقعد يرتاح , الا وفى يوم من الايام جات قعدته تحت شجره , ومن التعب عينيه غفلت وراح فى النوم , وقبل الليل ما ييجى حطت على الشجره تلت حمامات, ويقعدوا يتكلموا مع بعضهم والاخ دا يصحى على صوتهم , وقالت واحده من التلت حمامات لصاحباتها الحمامتين : اما البنى ادم دا غريب بشكل , وكملت الحمامه وقالت : ادينى جايه من المدينه اللى بعد الجبل , وهناك ملك المدينه زعلان , وحبس كل الاطباء اللى فى المدينه , وكملت كلامها وقالت : اصل الاميره بنت الملك عيانه , ومفيش حد عارف ايه اللى فيها , ولا اى طبيب قادر يشفيها , مع ان الاميره علاجها سهل جدا , لانها لو شمت وردة الشتا اللى فى جنينة القصر هتخف , وهتقوم وهتبقى عال العال, والاخ يفهم الكلام...
    وتقول الحمامه التانيه من التلت حمامات: اما البنى ادم دا غريب بشكل , ادينى جايه من المدينه اللى قبل الجبل , وكملت وقالت بتعجب : هناك الناس بيشربوا الميه فى الفنجان , لانهم بيشتروا الميه باغلى الاتمان , مع انهم لو فحتوا تحت باب المدينه هيلاقوا بير , ممكن يدى ميه لكل بيت الف زير _قالت كدا الحمامه التانيه_ , والاخ طبعا فهم الكلام عشان بيعرف لغة الحمام...
    وتقول الحمامه التالته من التلت حمامات : ياجماعه وهنروح بعيد ليه ولا المدينه اللى بعد الجبل , ولا المدينه اللى قبل الجبل , اهوه الشاب اللى تحت الشجره اللى احنا واقفين عليها , مش لاقى مكان يعيش فيه , ولا ميه يشربها , ولا اكل ياكله مع ان تحت رجليه تلت قدرات مليانه دهب تحميه , وتغنيه من اى جوع او عطش , وكلمت كلام وقالت بتعب : يالا كفايه بقى كلام ويالا ننام ...
    بس الاخ دا مانمشى .. فحت تحت رجليه ولقى التلت قدرات وفرح خالص وشالهم فوق كتافه وهو بيحمد ربنا , وراح بعد كدا المدينه اللى قبل الجبل وطلعلهم البير وكل من كان بقيت الميه فى بيته كتيييييييييييييير , وملك المدينه اللى قبل الجبل خلاه امير , وراح للمدينه اللى بعد الجبل , وخلى الاميره الجميله تشم وردة الشتا اللى فى جنينة القصر , والاميره خفت وبقيت تمام التمام , والملك كافاءه واداله نص مملكته وجوزه بنته الاميره الجميله ...
    وتروح الايام , وتعدى الايام , والشاب اللى اشتغل عند الخباز العجوز خلص منه الدهب , وراح يطلب الاحسان , ولقى زميله اللى كان شغال معاه ملك المملكه وعنده كل شىء..
    يستغرب صاحبه اللة اخد الدهب ويساله باندهاش : انت بقيت كدا ازاى ؟
    يرد عليه زميله اللى اصبح ملك الزمان ويقوله : انا اصلى لما اخترت .. اخترت اتعلم , وكمل وقاله وهو فرحان : انا اخترت العلام .


    الحكمه من الحدوته : ( ماتجريش ورا اللى تحت رجليك , وبص لقدام .. ولازم تفهم انه العلم هو اللى هيجيبلك الدهب , والماس , واحترام الناس .....
    وكمان اهم شىء ... هيجوزك الاميره الجميله )..


    [SIGPIC][/SIGPIC]
    .نظر الله لي فارشد أبنائي ....................... فشدوا إلى العلا أي شد
    إنما الحق قوة من قوى الديان ............... أمضي من كل أبيض وهندي
    قد وعدت العلا بكل أبي من رجالي .................. فانجزوا اليوم وعدي
    وارفعوا دولتي على العلم والأخلاق ................ فالعلم وحده ليس يجدي
    نحن نجتاز موقفاً تعثر الآراء فيه ..................... وعثرة الرأي تردى
    فقفوا فيـه وقـفة حزم .................. وارســوا جانبيـه بعزمة المسـتعد





  7. #7
    علم ولا دهب

    كان يا ماكان فى يوم من الايام اتنين اصحاب, راحوا يشتغلوا عند خباز عجوز , والشغل مع الخباز كان متعب جدا , لانهم يروحوا يجمعوا الحطب , يقوم المطر ينزل فوق الحطب ويبله , يقوموا يفضلوا ينشفوا فى الحطب طول اليوم لحد ما الحطب ينشف من الميه عشان يخبزوا بيه الخبز .....
    والخباز العجوز يقول للاتنين الاصحاب : انتوا تشتغلوا واكسب انا , انتوا تتعبوا وارتاح انا , وتفضلوا تشتغلوا عندى طوووووووول السنه , وانا فى اخر السنه اديكم اجرتكم ....
    يقول الاتنين فى نفسهم : ياااااااااااااااااااااااا ااااااه نفضل نشتغل سنه بحالها عشان ناخد اجرتنا , ويقولوا فى نفسهم : يالا سنه هتفوت بسرعه ان شاء الله..
    والايام تفوت وراها ايام وكل يوم ينزل المطر وينشفوا الحطب , ويخبزوا الاكل لحد ما السنه خلصت...
    ويروحوا للعجوز , عشان يديهم الاجره .. يقولهم العجوز : اللى عايز اجرته دهب اديهاله دهب , واللى عايز اجرته علم اديهاله علم...
    يقول الصاحب الاول : انا عايز اجرتى دهب , وياخد الدهب ويفرح , ويقول : يااااااااااه بعد شغل سنه بحالها اخيرا اخدت اجرتى, وكمان دهب , وهيخلينى الدهب دا غنى لسنين كتييييييييير قدام..
    والصاحب التانى يقول للعجوز : انا هاخد اجرتى علم , ضحك الخباز العجوز وقاله : شوف انت اشتغلت بكام , وانا مقابل شغلك دا تستاهل انى انا اعلمك لغة (الحمام)...
    يقول الاخ اللى اختار العلم : ازاى هو الحمام ليه لغه؟ , وحتى لو كانت له لغه , ياترى هتفيدنى فى ايه لغة الحمام ؟ , ومايلاقيش جواه اجابه , لكن ياخد من الخباز علم لغة الحمام , ويمشى قلقان ومهموم , لانه مش معاه فلوس ولا اى حاجه ياكل ويشرب منها .... وفضل يمشى يمشى وكل ما يحس بالجوع يستحمل , وكل مايحس بالتعب يقعد يرتاح , الا وفى يوم من الايام جات قعدته تحت شجره , ومن التعب عينيه غفلت وراح فى النوم , وقبل الليل ما ييجى حطت على الشجره تلت حمامات, ويقعدوا يتكلموا مع بعضهم والاخ دا يصحى على صوتهم , وقالت واحده من التلت حمامات لصاحباتها الحمامتين : اما البنى ادم دا غريب بشكل , وكملت الحمامه وقالت : ادينى جايه من المدينه اللى بعد الجبل , وهناك ملك المدينه زعلان , وحبس كل الاطباء اللى فى المدينه , وكملت كلامها وقالت : اصل الاميره بنت الملك عيانه , ومفيش حد عارف ايه اللى فيها , ولا اى طبيب قادر يشفيها , مع ان الاميره علاجها سهل جدا , لانها لو شمت وردة الشتا اللى فى جنينة القصر هتخف , وهتقوم وهتبقى عال العال, والاخ يفهم الكلام...
    وتقول الحمامه التانيه من التلت حمامات: اما البنى ادم دا غريب بشكل , ادينى جايه من المدينه اللى قبل الجبل , وكملت وقالت بتعجب : هناك الناس بيشربوا الميه فى الفنجان , لانهم بيشتروا الميه باغلى الاتمان , مع انهم لو فحتوا تحت باب المدينه هيلاقوا بير , ممكن يدى ميه لكل بيت الف زير _قالت كدا الحمامه التانيه_ , والاخ طبعا فهم الكلام عشان بيعرف لغة الحمام...
    وتقول الحمامه التالته من التلت حمامات : ياجماعه وهنروح بعيد ليه ولا المدينه اللى بعد الجبل , ولا المدينه اللى قبل الجبل , اهوه الشاب اللى تحت الشجره اللى احنا واقفين عليها , مش لاقى مكان يعيش فيه , ولا ميه يشربها , ولا اكل ياكله مع ان تحت رجليه تلت قدرات مليانه دهب تحميه , وتغنيه من اى جوع او عطش , وكلمت كلام وقالت بتعب : يالا كفايه بقى كلام ويالا ننام ...
    بس الاخ دا مانمشى .. فحت تحت رجليه ولقى التلت قدرات وفرح خالص وشالهم فوق كتافه وهو بيحمد ربنا , وراح بعد كدا المدينه اللى قبل الجبل وطلعلهم البير وكل من كان بقيت الميه فى بيته كتيييييييييييييير , وملك المدينه اللى قبل الجبل خلاه امير , وراح للمدينه اللى بعد الجبل , وخلى الاميره الجميله تشم وردة الشتا اللى فى جنينة القصر , والاميره خفت وبقيت تمام التمام , والملك كافاءه واداله نص مملكته وجوزه بنته الاميره الجميله ...
    وتروح الايام , وتعدى الايام , والشاب اللى اشتغل عند الخباز العجوز خلص منه الدهب , وراح يطلب الاحسان , ولقى زميله اللى كان شغال معاه ملك المملكه وعنده كل شىء..
    يستغرب صاحبه اللة اخد الدهب ويساله باندهاش : انت بقيت كدا ازاى ؟
    يرد عليه زميله اللى اصبح ملك الزمان ويقوله : انا اصلى لما اخترت .. اخترت اتعلم , وكمل وقاله وهو فرحان : انا اخترت العلام .


    الحكمه من الحدوته : ( ماتجريش ورا اللى تحت رجليك , وبص لقدام .. ولازم تفهم انه العلم هو اللى هيجيبلك الدهب , والماس , واحترام الناس .....
    وكمان اهم شىء ... هيجوزك الاميره الجميله )..

    [SIGPIC][/SIGPIC]
    .نظر الله لي فارشد أبنائي ....................... فشدوا إلى العلا أي شد
    إنما الحق قوة من قوى الديان ............... أمضي من كل أبيض وهندي
    قد وعدت العلا بكل أبي من رجالي .................. فانجزوا اليوم وعدي
    وارفعوا دولتي على العلم والأخلاق ................ فالعلم وحده ليس يجدي
    نحن نجتاز موقفاً تعثر الآراء فيه ..................... وعثرة الرأي تردى
    فقفوا فيـه وقـفة حزم .................. وارســوا جانبيـه بعزمة المسـتعد





  8. #8
    تاريخ التسجيل
    Oct 2007
    المشاركات
    6,529
    جزاك الله كل خير يا ريس
    خد بقه الحدوته دى
    دا ابويه كان هرينى حوديت
    كان راجل مصاحب واحد ساكن فى عشه من الطوب اللبن ولها طاقه (جحر يعنى فى جدرها)
    وراح له فى يوم وقال له انا عايز جنيه سلف
    قال له مد ايدك فى الطاقه خده
    مد ايده وخده
    بعد كم يوم رجع
    وقال له الجنيه اهو وشكرا"
    قال له حط الجنيه فى المكان اللى اخدت منه
    راح حطه
    بعد شويه نفس الشئ اكرر ياخد الجنيه ويرجعه فى نفس مكانه

    وفى مره خد الجنيه ولا رجعش
    وازنق فى جنيه تانى
    راح للرجل وقال له انا عايز جنيه سلف
    قال له مد ايدك فى الطاقه خده
    راح الرجل مد ايديه فى الطاقه ملقاش حاجه
    قال له مفيش فيه حاجه
    قال له الراجل لهو انت مرجعتش
    رد وقال له لاء
    قال له الرجل
    لو كنت رجعته كنت لقيته
    الغرض يعنى من الحدوته واضح صح ولا ايه

+ الرد على الموضوع

المواضيع المتشابهه

  1. حواديت أبلة فضيلة بصوتها حصرياً لأطفال طريق العلم
    بواسطة همس*المشاعر في المنتدى منتدى القصص
    مشاركات: 1
    آخر مشاركة: 03-21-2011, 07:57 PM
  2. حواديت الكبار
    بواسطة المذهله في المنتدى الخواطر الأدبية
    مشاركات: 1
    آخر مشاركة: 03-21-2011, 07:31 PM
  3. وقول يا زمان أرجع يا زمان
    بواسطة شمـ الـوداع ــس في المنتدى المواضيع العامة
    مشاركات: 5
    آخر مشاركة: 06-17-2010, 11:22 AM
  4. إنتهى زمان اللاب توب .. وجاء زمان الرول توب فيديو
    بواسطة شجون القمر في المنتدى المواضيع العامة
    مشاركات: 5
    آخر مشاركة: 11-02-2009, 12:32 AM

الكلمات الدلالية لهذا الموضوع

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
جميع الحقوق ل رياض حسونة